श्री झक्कप्रसाद आचार्यले १ डिसेम्बर २०२४ मा पश्चिम बंगालका लागि नेपाली महावाणिज्यदूतको रूपमा जिम्मेवारी सम्हाल्नुभयो।

नेपाल सरकारका एक महत्वपूर्ण अधिकारीका रूपमा वहाँसँग सार्वजनिक वित्त, मानव संसाधन व्यवस्थापन, गृह प्रशासन, र सार्वजनिक प्रशासनका क्षेत्रमा लामो अनुभव छ। आफ्नो जागरको प्रारम्भिक वर्षहरूमा वहाँले अर्थ मन्त्रालयमा कार्यरत रहनुभयो। उक्त मन्त्रालयमा वहाँले करसम्बन्धी सेवाहरू र राजस्व सङ्कलनका महत्वपूर्ण जिम्मेवारीहरू सम्हाल्नु भएको थियो। साथै, वहाँले सोही मन्त्रालयभित्र मानव संसाधन व्यवस्थापनसम्बन्धी जिम्मेवारीहरू पनि निर्वाह गर्नुभएको थियो।

वहाँले लोक सेवा आयोगमा सहसचिवको रूपमा पनि काम गर्नुभयो। त्यहाँ वहाँले सुरक्षा सङ्गठनहरू र संस्थागत निकायहरूका लागि कर्मचारी भर्ना प्रक्रियामा केन्द्रित रहनुभयो। त्यसपछि, वहाँ पुनः अर्थ मन्त्रालयमा फर्कनुभयो र विभिन्न विभागहरूमा नीतिगत तहमा योगदान गर्नुभयो। वहाँको अनुभव केन्द्रीय तथा प्रान्तीय स्तरको बजेट निर्माण र शासन व्यवस्थापनसमेत रहेको छ।

अर्थ मन्त्रालयमा मात्रै वहाँले शाखा अधिकृतदेखि उपसचिव हुँदै सहसचिवसम्मको आफ्नो लामो सेवाकालमा कर, व्यापार, बजेट निर्माण, तथा विशेष गरी करसम्बन्धी आर्थिक कानुन निर्माणमा राम्रो विशेषज्ञता हासिल गर्नु भएको छ। साथै, वहाँलाई नेपालको श्रम कूटनीतिमा पनि राम्रो अनुभव छ।

यस अतिरिक्त महावाणिज्यदूतज्यूसँग नेपालका विभिन्न सरकारी संस्थाहरूमा कार्य गरेको वृहत्तर अनुभव छ। वहाँले गृह मन्त्रालयमा सहसचिव तथा प्रमुख जिल्ला अधिकारीका रूपमा, राष्ट्रिय परिचयपत्र तथा पञ्जीकरण विभागमा महानिर्देशकका रूपमा, श्रम, रोजगार तथा सामाजिक सुरक्षा मन्त्रालयमा सहसचिवका रूपमा, कर्णाली प्रदेशका विभिन्न मन्त्रालयहरूमा प्रदेश सचिवका रूपमा, र आन्तरिक राजस्व विभागमा महानिर्देशकका रूपमा सेवा गर्नुभएको छ।

महावाणिज्यदूतको जिम्मेवारी सम्हाल्नु अघि वहाँले छोटो अवधि नेपाल परराष्ट्र मन्त्रालयमा सहसचिवका रूपमा सेवा गर्नुभयो।

महावाणिज्यदूत आचार्यले भारत, चीन, अमेरिका, सिंगापुर, दक्षिण कोरिया, इन्डोनेसियालगायतका देशहरूमा आयोजित विभिन्न राष्ट्रिय तथा अन्तर्राष्ट्रिय तालिम तथा सेमिनारहरूमा सहभागि हुनुभएको छ।

नेपाल सरकारबाट विशिष्ट सम्मान तथा पदक प्राप्त गर्नुभएका श्री आचार्य नागरिक सेवा पुरस्कार (Civil Service Prize) तथा सुप्रबल जनसेवा श्री (सुनौलो पदक) जस्ता प्रतिष्ठित सम्मानहरूबाट विभूषित हुनुहुन्छ।

महावाणिज्यदूत आचार्यले नेपालको त्रिभुवन विश्वविद्यालयबाट सार्वजनिक प्रशासन तथा अर्थशास्त्रमा स्नातकोत्तर उपाधि हासिल गर्नुभएको छ।

महावाणिज्यदूत श्री झक्कप्रसाद आचार्य र वहाँकी श्रीमती सीता आचार्यका तीन सन्तान हुनुहुन्छ।